1 Kings 16
1 上主對哈拿尼个孻仔先知耶戶講話，愛佢將以下个消息㧯巴沙講：
2 「𠊎對泥粉中將你提升，設立你做𠊎个子民以色列个領袖。你反轉犯罪，像耶羅波安共樣，害𠊎个子民陷在罪惡當中。佢等个罪惹𠊎發譴，
3 所以𠊎愛除滅你㧯你个家族，像𠊎對待耶羅波安个家族共樣。
4 你屋下所有个人，死在城肚个一定會被狗仔食掉，死在山野个一定會被鳥仔食掉。」
5 巴沙其他个事，㧯佢英勇个所做，全部記在《以色列列王史》底背。
6 巴沙死後葬在得撒。佢个孻仔以拉承接佢做王。
7 哈拿尼个孻仔先知耶戶講出上主責備巴沙㧯佢家族个話，因為巴沙犯罪，行上主看做邪惡个事。佢惹上主發譴，因為佢㧯耶羅波安家族共樣行邪惡个事，也因為佢㓾掉耶羅波安家族所有个人。
8 猶大王亞撒在位第二十六年，巴沙个孻仔以拉做以色列王。佢在得撒統治兩年。
9 有一個軍官心利，佢指揮王室一半个戰車，想愛造反。當王在得撒管理王宮事務大臣亞雜屋下食酒醉个時，
10 心利入去屋肚，將以拉㓾死，篡佢个王位。這事發生在猶大王亞撒在位第二十七年。
11 心利一坐王位就將巴沙全家个人㓾掉，連佢个親戚㧯朋友，凡係男人也全部㓾死。
12 心利㓾掉巴沙全家，這事係應驗上主通過先知耶戶責備巴沙个話。
13 因為巴沙㧯厥孻仔以拉拜偶像，又害以色列人犯罪，佢等就惹上主—以色列个上帝發譴。
14 以拉其他个事全部記在《以色列列王史》底背。
15 猶大王亞撒在位第二十七年，心利在得撒做王七日。該時，以色列个軍隊堵好在該位安營圍攻非利士个基比頓城。
16 佢等聽到心利造反，㓾掉王，佢等當日就在營肚立元帥暗利做以色列王。
17 暗利㧯佢个軍隊離開基比頓轉去圍攻得撒。
18 心利看到城已經被人佔領，就入王宮內个城堡，放火燒王宮，將自家燒死。
19 這係因為心利犯罪，行上主看做邪惡个事。佢像耶羅波安共樣毋單淨自家犯罪，又害以色列人犯罪，惹上主發譴。
20 心利其他个事，包含佢陰謀造反王个經過，全部記在《以色列列王史》底背。
21 以色列人民分做兩派：一派愛設立基納个孻仔提比尼做王，另外一派擁護暗利。
22 最後，該兜擁護暗利个人贏了。提比尼死掉，暗利就做王。
23 猶大王亞撒在位个第三十一年，暗利做以色列王。佢在位十二年，前六年在得撒。
24 後來，佢用六千隻銀幣對一個名喊撒馬个人該位將撒馬利亞山買過來。暗利在這山頂起一座城，照這山原主撒馬个名㧯它安到撒馬利亞。
25 暗利比佢以前所有个王犯還較重个罪，行上主看做邪惡个事。
26 佢像耶羅波安共樣，毋單淨自家犯罪，又害以色列人犯罪，拜偶像，惹上主—以色列个上帝發譴。
27 暗利其他个事㧯佢勇敢个行為全部記在《以色列列王史》底背。
28 暗利死掉以後葬在撒馬利亞。佢个孻仔亞哈承接佢做王。
29 猶大王亞撒在位第三十八年，暗利个孻仔亞哈做以色列王。佢在撒馬利亞統治二十二年。
30 亞哈犯罪，行上主看做邪惡个事，比佢以前所有个王還較厲害。
31 佢所犯个罪比耶羅波安王還較重，佢又討西頓王謁巴力个妹仔耶洗碧做𡜵娘，還去拜巴力。
32 佢在撒馬利亞起巴力个廟，在廟肚為巴力起一座祭壇。
33 亞哈又頓一支亞舍拉女神个柱像來拜。佢所犯个罪比佢以前所有个以色列王還較重，惹上主—以色列个上帝發譴。
34 佢在位个時，伯特利人希伊勒重建耶利哥城。照上主通過嫩个孻仔約書亞所講个預言，希伊勒在耶利哥城打地基个時，大个孻仔亞比蘭死掉；當佢安城門个時，細个孻仔西割死掉。